काठमाडौं । महाभियोग सिफारिश समितिले निलम्बित प्रधानन्यायाधीश चोलेन्द्र शम्शेर जबरासँग आज २४ वटा प्रश्नको जवाफ सोधेको छ।
बयानको चौथो दिन २४ प्रश्न साेधेपछि हालसम्म ३५ प्रश्नको जवाफ लिइसकेकाे समितिका सदस्य मीनबहादुर विश्वकर्माले बताए। अब जबरासँग मंगलबार बाँकी प्रश्नको जवाफ लिने उनले बताए।
जबरासँग बयान सकिएपछि यही महिनाको मसान्तभित्रै प्रतिवेदन पेश गर्ने तयारी गरेको उनले बताए। जबराविरुद्ध समितिले ४२ वटा प्रश्न तयार गरेको छ।
तर जबरा भने प्रश्नको उत्तरमा भन्दा आफ्ना सहकर्मी न्यायाधीशहरु र राजनीतिक दलका शीर्ष नेतालाई आरोप लगाउनमै समय खर्च गरिरहेका छन्।
जबराविरुद्ध गत फागुन १ गते ९८ जना सांसदले महाभियोगको प्रस्ताव दर्ता गराएका थिए। त्यसपछि उनी स्वतः निलम्बनमा परेका छन्।
सत्तारूढ दल नेकपा माओवादी केन्द्रका देव गुरुङ, नेपाली कांग्रेसकी पुष्पा भुसाल र एकीकृत समाजवादीका जीवनराम श्रेष्ठ प्रस्तावक रहेको जबराविरुद्धको महाभियोग प्रस्ताव गत वर्ष फागुन २९ गते प्रतिनिधिसभाको बैठकमा पेश भएको थियो। त्यसपछि सभामुख अग्निप्रसाद सापकोटाले महाभियोग सिफारिश समिति बनाएका थिए।
उक्त समितिमा मीनबहादुर विश्वकर्मा, शिवमाया तुम्बाहाम्फे, विष्णु पौडेल, लालबाबु पण्डित, कृष्णभक्त पोखरेल, यशोदा सुवेदी, रामबहादुर विष्ट, रेखा शर्मा, कल्याणी खड्का, प्रमोद साह र एकबाल मियाँ सदस्य रहेका छन्।
प्रतिनिधिसभाको कार्यकाल अब एक हप्तामात्र बाँकी रहँदा समितिले बयान सक्ने नसक्ने अझै अन्योल छ। प्रतिनिधिसभाको कार्यकाल सकिएपछि समितिको औचित्य सकिने भएकोले महाभियोग स्वतः खारेज हुने एकथरिको मत छ भने अर्कोथरिले चाहीँ महाभियोग कायमै रहने धारणा राखिरहेका छन्।
फरकबाटो २६ भाद्र २०७९, आईतवार १९:४४