काठमाण्डौ । प्रमुख प्रतिपक्ष दल नेकपा एमालेका अध्यक्ष केपी शर्मा ओलीले वर्तमान सरकारलाई बोकिरहन नसकिने टिप्पणी गरेका छन् । वर्तमान सरकार देशका लागि निष्प्राण र हानिकारक दुवै भएकाले यसलाई बोकेर हिँड्न नसकिने अध्यक्ष ओलीको तर्क थियो ।
आज सोमवार ललितपुरमा आयोजित विभिन्न सञ्चारमाध्यामका सम्पादकहरूसँगको अन्तरक्रियामा बोल्दै उनले सरकार चलेन, काम लागेन भन्ने स्पष्ट भइसकेको भन्दै यसलाई बोकिरहन उपयुक्त नहुने बताए । सरकार र सत्तारूढ गठबन्धन देशका लागि मृत भइसकेकाले यसलाई कायम राखेर गए देशमा हैजा फैलाउने ओलीको भनाइ थियो ।
अध्यक्ष ओलीले भने, ‘अब यो गठबन्धनको सरकार चलेन, काम लागेन भन्ने स्पष्ट भयो, यसैलाई बोकिरहन अब उपयुक्त हुँदैन । यो सरकार निष्प्राण भयो र हानिकारक छ । यसले हैजा फैलाउँछ । यसले समाजलाई दूषित गर्छ । मृत भइसकेपछि सतिदेवीलाई शिवले काँधमा बोकेर हिँड्दा त उनी काम लागिनन् भने यस्तो गठबन्धन बोकेर, हिँडेर कुनै अर्थ छ रु यो कुनै काम आउन सक्छ ? त्यस कारण यस परमादेशी सरकारको कुनै अर्थ छैन । अहिले यत्ति भनौँ । हामी सकेसम्म सहमतिको राम्रो बाटोमा जान चाहन्छौँ । भएन भने पनि देशलाई कुबाटोमा जानबाट रोक्ने कोसिस गर्छौँ ।’
अध्यक्ष ओलीले सरकारका सबै अङ्ग झर्न लागेको र अर्थमन्त्री जनार्दन शर्माको राजीनामा त्यसैको दृष्टान्त भएको जिकिरसमेत गरे । उनले देश सङ्घीय संसद् र प्रदेश सभाको चुनावमा प्रवेश गरिसकेकाले पनि परमादेशी वर्तमान सरकारको कुनै औचित्य नभएको दोहोर्याए ।
अध्यक्ष ओलीले आफ्नो पार्टीले चाहेको भए सत्तारूढ गठबन्धन उहिले नै टुटिसकेको हुने दाबीसमेत गरे । उनले गठबन्धनलाई नक्कली बिहेको संज्ञा दिँदै त्यसो गरेर साँचो डिभोर्स गर्ने पक्षमा आफ्नो पार्टी नरहेको टिप्पणी गरे ।
फरकबाटो २७ असार २०७९, सोमबार १८:२६