अहिले मतदातालाई धन्यवाद भनाैँ, घाेषणापत्र अनुसार काम गर्न सकेकाे दिन विजय जुलुस मनाउँला : बालेन्द्र

काठमाण्डौ । काठमाण्डौ महानगरपालिका मेयर पदमा स्वतन्त्र उम्मेदवार बालेन्द्र साह ुबालेनुले आफ्नो जित पक्का भएसँगै विजय जुलुस नगर्न सबैलाई आग्रह गरेका छन् ।

बालेनले १९ हजार तीन सय २३ मत गणना गर्न बाँकी हुँदा उनले २० हजार मतको अग्रता बनाइसकेका छन् योसँगै बालेनको जित हुने सुनिश्चित भएको छ । जित निश्चित भएसँगै बालेनले आफ्नो चुनावी प्रक्रियामा सहभागी हुने सबैलाई धन्यवाद दिँदै आ आफ्नो ठाउँबाट सबैले धन्यवाद र्‍याली निकाल्ने तर विजय जुलुस नगर्न आग्रह गरेका हुन् । यस्तै उनले आफूले चुनावी घोषणापत्रमा उल्लेख भएका काम पूरा गर्न सकेको दिन मात्र विजय जुलुस निकाल्न आफ्ना समर्थकलाई आग्रह गरेका छन् ।

बालेन्द्रले आफ्नो फेसबुक पेजमा लेखेका छन्, ‘जित हारलाई मतगणना सकिएसँगै सकिदिउँ । घोषणापत्रमा भएका कुराहरु लागू गर्न सकेका दिन सबै मिलेर विजय उत्सव मनाउँला । तर अहिले विजय जुलुस भनेर अरुलाई पराजित भन्ने संकेतसम्म पनि नगरौँ ।’

काठमाण्डौ महानगरमा अहिलेसम्म एक लाख ७१ हजार ८०२ मत गणना हुँदा बालेनले ५५ हजार ७४५ मत प्राप्त गरेका छन् । बालेनले आफ्ना निकट प्रतिस्पर्धी कांग्रेस उम्मेदवार सिर्जना  सिंहलाई २० हजार ३७६ को फराकिलो मतान्तरले पछि पारेका छन् । सिंहले ३५ हजार ३७१ मत प्राप्त गरेका छन् । यस्तै एमाले उम्मेदवार केशव स्थापितले ३४ हजार ६२६ मत पाएका छन् ।