दैलेख । नेपाल कम्युनिष्ट पार्टी एमालेका अध्यक्ष केपी शर्मा ओलीले दैलेखमा पेट्रालिम पदार्थ भएको पुष्टि भइसक्दा पनि अहिलेको सरकारले थप काम गर्न नसकेको भन्दै अब एमाले सरकारले गर्न सक्ने बताएका छन् । बिहीबार दैलेखको दुल्लु पुगेका उनले दैलेखमा पेट्रोलियम पदार्थ रहेको भन्ने पुष्टि भएको र यहाँको मात्र नभई राष्ट्रको विकासमा टेवा पुग्ने थाहा हुँदाहुँदै पनि अहिलेको सरकारले काम गर्न नचाहेको बताएका हुन् ।
पार्टी प्रवेश तथा चुनावी सभामा सहभागी हुन जुम्ला र कालिकोट जाने क्रममा दैलेखको दुल्लुमा एमाले दैलेखले आयोजना गरेको भेटघाट कार्यक्रममा बोल्दै अध्यक्ष ओलीले पेट्रालिम पदार्थको उत्खनन एमालेको सरकारले मात्रै गर्न सक्ने र फेरि पनि एमालेकै नेतृत्वमा सरकार आवश्यक रहेको दैलेखी जनताले बुझिसकेको बताएका हुन् । आफ्नो सरकारले ग्रामीण भेगको विकासका लागि २ सय १० वटा बाटाहरू शिलान्यास गरेको भए पनि अहिलेको सरकारको काम गर्ने क्षमता नहुँता कटौती गरेको बताए ।
अध्यक्ष ओलीले आफ्नै सरकारका पालामा देशभर खरका छाना मुक्त अभियान ल्याएको बताउँदै दैलेखमा पनि धेरै नागरिकका घर खरका छाना मुक्त भएर जस्तापाता लगाइएका बताए । उनले बाँकी रहेका घरहरूमा जस्तापाता नपुगेको भए एमालेले पहल गर्ने बताए ।
अध्यक्ष ओलीले आफ्नो सरकारको तीन वर्षे कार्यकालमा देशको विकासका लागि राम्रा कामहरू गरेको र पुनः एमाले सरकारमा आए पछि विकासे गतिलाई तीव्रता दिने बताए । अध्यक्ष ओलीले अहिले पनि केही व्यत्तिहरु अन्य पार्टीमा रहेकाले एमालेले अघि सारेको समृद्ध नेपाल सुखी नेपालीको नारालाई आत्मसात गर्दै सबैलाई एमालेको देश बनाउने अभियानमा लाग्न आग्रह गरे ।
फरकबाटो १७ चैत्र २०७८, बिहीबार १३:५०