सुर्खेत । बंगलादेशको ढाँकामा आयोजना हुने अन्तर्राष्ट्रिय कंराते प्रतियोगितामा सहभागी हुने खेलाडीहरुलाई बिदाई गरिएको छ । जिल्ला खेलकुद विकास समितिको समन्वयमा नेपाल गो–जुरियो दो कंराते संघ सुर्खेतले बुधबार एक कार्यक्रमको आयोजना गरि सुर्खेतका दुई जना खेलाडीलाई बिदाई गरेको हो ।
सुर्खेतका खेलाडीहरु प्रकाश खड्का र सन्दिप महतलाई बिदाई गरिएको छ । यही पुस १२ गतेदेखि १४ गतेसम्म ढाँकामा हुने प्रतियोगितामा सहभागी हुने नेपाली टिममा कर्णालीका तिनजना खेलाडि सहभागी हुँदैछन् ।
सुर्खेतका दुईजना सहित दैलेखका हिक्मत रोका मगर समेत उक्त प्रतियोगितामा सहभागी हुँदैछन् । उनीहरु बिहीबार साँझ ५ बजे ढाँकाका लागि प्रस्थान हुने संघले जानकारी दिएको छ ।
बिदाई कार्यक्रम जिल्ला खेलकुद विकास समितिका अध्यक्ष चन्द्र कुमार गिरीको प्रमुख आतिथ्यता र संघका अध्यक्ष लोकेन्द्रराज शाहीको अध्यक्षतामा भएको थियो ।
खेलाडीहरु आफ्नै खर्चमा प्रतियोगितामा सहभागी हुन लागेका हुन् । प्रतियोगितामा सहभागी हुनका लागि सरकार र सम्बन्धित निकाय कसैले पनि हालसम्म कुनै सहयोग नगरेको खेलाडीहरुको गुनासो रहेको छ ।
फरकबाटो ७ पुष २०७८, बुधबार १९:०९