हुम्लामा जीप दुर्घटना, दुईजनाको मृत्यु


सुर्खेत । हुम्लाको ताँजाकोट गाउँपालिका–२ पुईमामा जीप दुर्घटना हुँदा दुई जनाको मृत्यु भएको छ । कर्णाली करिडोर अन्तर्गत हुम्लाको सर्केगाड गाउँपालिकाको सर्केगाड बजारबाट बाजुरातर्फ गुडिरहेको लु १ ज ३०४३ नम्बरको जीप आज दिउँसो दुर्घटनामा परेको हो ।

दुर्घटनामा मृत्यु हुनेहरुमा बाँकेको नेपालगञ्ज उपमहानगरपालिका–२० की ४९ वर्षीया विष्णु परियार र हुम्लाको चङ्खेली गाउँपालिका–६ का ६ वर्षीय बालक अविशेक बुढा रहेका जिल्ला प्रहरी कार्यालय हुम्लाले जानकारी दिएको छ ।

प्रहरीका अनुसार जीप बिग्रिएपछि बनाउँदै गर्दा पछाडी सरेर दुर्घटना भएको हो । जीपमा सात जना रहेकामा जीप बनाउने क्रममा पाँच जना बाहिर निस्किएका र जीपमै रहेका दुई जनाको मृत्यु भएको प्रहरीको भनाई छ ।