सुर्खेत । प्रधानमन्त्री पुष्पकमल दाहाल प्रचण्डले राष्ट्रपति विद्यादेवी भण्डारीसमक्ष सरकारको सातौँ वार्षिक प्रतिवेदन पेस गरेका छन् । आइतवार राष्ट्रपति निवास शीतल निवासमा पुगेर प्रधानमन्त्री प्रचण्डले सरकारले आर्थिक वर्ष २०७८/०७९ मा गरेका काम कारबाही समेटिएको प्रतिवेदन पेस गरेका हुन् । यो वार्षिक प्रतिवेदन फागुन १५ गते बसेको मन्त्रिपरिषद्को बैठकले स्वीकृत गरेको थियो ।
प्रधानमन्त्रीले आर्थिक वर्ष २०७८/०७९ मा सङ्घीय शासन प्रणालीलाई सुदृढ गरी सुशासनलाई राज्यका सबै तहमा संस्थागत गर्न, विकास निर्माणलाई गति दिन तथा सार्वजनिक सेवा प्रवाहमा सुधार गर्न विभिन्न प्रयास भएको बताए । सङ्घीयतालाई सुव्यवस्थित बनाउन गएको चुनाव सफल बनाएको र गृह प्रशासन सक्षम र सबल बनाएको उनले बताए । प्रतिवेदनमा फोहरमैला व्यवस्थापन राष्ट्रिय नीति २०७९ स्वीकृत भएको उल्लेख गरिएको छ ।
त्यस्तै प्रधानमन्त्रीले राष्ट्रपति भण्डारीलाई पढेर सुनाएको प्रतिवेदनमा सार्वजनिक खर्चलाई मितव्ययी तथा प्रभावकारी बनाउन मापदण्ड स्वीकृत भएको बताए । वित्तीय प्रणाली सुधारका सम्बन्धमा सरकारी भुक्तानी प्रणालीमा विद्युतीय प्रणाली लागू गरिएको उनले बताए । २३ जिल्लाका दुई लाख २३ हजार तीन सय ३० गरिब परिवार पहिचान गरी परिचयपत्र वितरण सुरु भएको उनले बताए ।
प्रधानमन्त्री प्रचण्डले यस वर्ष ठूला, मझौला, घरेलु तथा साना गरी तीन सय नौ वटा उद्योग दर्ता भएको र विदेशी लगानीका दुई सय ९५ वटा परियोजनामार्फत ५४ अर्ब १५ करोड रुपैयाँ लगानी गर्ने प्रस्ताव स्वीकृत गरिएको बताए । उनले यी परियोजना प्रस्तावबाट १६ हजार नौ सय पाँच जनालाई रोजगारी सिर्जना हुने आँकलन गरिएको पनि बताए ।
फरकबाटो २१ फाल्गुन २०७९, आईतवार २०:३५