दैलेख । करिब दुई सय वर्ष पुरानो इतिहास बोकेको ऐतिहासिक सुन्दरी तोप पाँच दशकपछि दैलेखको कोतगढीमै पुनर्स्थापना गरिएको छ । नेपाली सेना र स्थानीय सरकारको पहलमा सुर्खेतबाट दैलेख ल्याएसँगै सुन्दरी तोप गढीमा राखिएको हो ।
नेपाली सेनाको पश्चिम कमाण्ड रथि ब्रिगेड जर्नेल प्रेम शाही र नारायण नगरपालिकाका मेयर लोमन शर्माले हिजो एक कार्यक्रमकाबीच संयुक्त रूपमा तोपको पुनर्स्थापना गरेका हुन् ।
बहादुर शाहको नायबी शासनकालमा बाइसे(चौबिसे राज्यलाई नेपाल एकीकरणमा जोड्ने क्रममा अम्मरसिंह थापाले कोतगढी किल्ला निर्माण गर्न लगाइ तोप राखिएको मानिन्छ । नेपाल एकीकरणपछि अहिलेको जिल्ला सदरमुकाममा रहेको कोतगढी किल्ला आसपास ब्यारेकमा सेना बसेको थियो ।
२०२८ सालमा ठूलो भोकमरीका कारण ब्यारेक सुर्खेत सर्दा अर्घा र सुन्दरी नामका दुई वटा तोप दैलेखबाट बोकेर सुर्खेत पुर्याइएको थियो । सुर्खेतकोे बाहिनीमा राखिएको तोप दैलेखको कोतगढीको अभिन्न ऐतिहासिक सम्पदा भएको भन्दै कोतगढीमा राखिनु पर्ने मागपछि सुन्दरी तोप फर्काइएको हो ।
दैलेखमा रहेको कालीदत्त गुल्मका गुल्मपति सेनानी विनोद चौलागाईँ, यसअघिको समसुर गुल्मका सेनानी दिनेश लामाले तोप फर्काउनका लागि सेनाको माथिल्लो निकायमा पहल गरेका थिए ।
कोतगढीमा राखिएको सुन्दरी तोपको संरक्षणसँगै पूर्ण व्यवस्थापनको जिम्मेवारी नारायण नगरपालिकाले लिएको छ । नगरपालिकाले सुन्दरी तोपमार्फत जिल्लाको पर्यटन प्रवर्द्धनमा सघाउ पुग्ने अपेक्षा गरेको छ । सुन्दरी तोप ५० वर्षपछि दैलेख फर्काइए पनि अर्गा तोपु कहाँ छ भन्ने अझै खुल्न सकेको छैन ।
स्थानीय सरकार र नागरिक समाजले निरन्तर आवाज उठाएपछि २०७८ साल पुस २० गते सुर्खेतबाट सुन्दरी तोप कालीदत्त गुल्मको काँडाचौर ब्यारेकमा ल्याइएको थियो ।
फरकबाटो १० असार २०७९, शुक्रबार १०:०७