काठमाडौं । लोक गायक प्रकाश सपुत अभिनित चलचित्र ‘परदेशी–२’ आगामी दशैंमा प्रदर्शन हुने भएको छ । पछिल्लो समय गोकगीतमा आफ्नो फरक शैलीका कारण चर्चामा रहेका प्रकाशले यसै चलचित्रबाट ठुलो पर्दामा डेब्यु गर्न लागेका हुन् । यसअघि उनले म्युजिक भिडियोमा भने अभिनय गरिसकेका छन् ।
रमेश बिजीको कथा रहेको चलचित्रलाई राजेश बंशलले निर्माण गरेका हुन् । चलचित्रको कथा दशैंको परिवेशसँग जोडिएकोले दशैंमा नै रिलिज गर्ने निर्देशक रायमाझीले यसअघि नै बताइसकेका छन् । त्यसो त २०७६ साल फागुन १० गते छायाँकनमा जाँदै गर्दा २०७७ को दशैंमा चलचित्र प्रदर्शन गर्ने बताइएको थियो । तर, कोरोना महामारीका कारण चलचित्रको छायाँकन बिचैमा रोकियो । लकडाउन खुले लगत्तै २०७८ को दशैंलाई प्रदर्शन मिति तय गरियो । यो वर्षपनि दशैंमा हल खुल्न सकेनन्, जसका कारण परदेशीको रिलिज थप एक वर्ष पछि धकेलिएको छ । शनिबार निर्माण टिम र बितरण कम्पनी बिच भएको छलफल पछि उक्त मितिलाई लक गरिएको हो ।
अमेरिका र भारतको विभिन्न स्थानसँगै पोखरा, पाल्पा, चितवन र काठमाडौंलगायतका स्थानमा चलचित्रको छायाँकन गरिएको छ । अध्ययनका लागि विदेशिने नेपाली विद्यार्थीहरुको विषयवस्तुलाई चलचित्रमा देख्न पाइने छ ।
चलचित्रमा चलचित्रलाई नारायण इन्टरनेशनल प्रालिको ब्यानरमा राजेश वंशल र नारायण रायमाझीले संयुक्त रुपमा निर्माण गरेका हुन् । चलचित्रमा मानकृष्ण महर्जनको छायाँकन, अष्ट महर्जनको द्वन्द्व, बिबि अनुरागीको संगीत, गोविन्द राई र रामजी लामिछानेको कोरियोग्राफी र दीर्घ खड्काको सम्पादन रहेको छ ।
फरकबाटो २२ फाल्गुन २०७८, आईतवार ११:२९