शहीद स्मारक ‘ए’ डिभिजन लिगमा आजदेखि अन्तिम चरणका खेल सुरु हुँदै

काठमाण्डाै । शहीद स्मारक ‘ए’ डिभिजन लिग फुटबलमा आजदेखि अन्तिम चरणका खेल सुरु हुँदैछन् । १३औँ चरण अन्तर्गत दशरथ रङ्गशालामा आज हुने खेलमा हिमालयन शेर्पा क्लब र फ्रेन्ड्स क्लब खेल्दैछन् ।

खेल दिउँसो एक बजे सुरु हुनेछ । हिमालयन शेर्पा १२ खेलमा १३ अङ्क जोडेर दशौँ स्थानमा छ । फ्रेन्ड्स १२ खेलमा १० अङ्क जोडेर १२औँ स्थानमा छ । यस्तै एन्फा कम्प्लेक्स सातदोबाटोमा च्यासल युथ क्लब र सातदोबाटो युथ क्लब खेल्दैछन् । खेल दिउँसो एक बजे सुरु हुनेछ ।

रेलिगेसनमा परिसकेको च्यासल १२ खेलमा ६ अङ्क जोडेर पुछारमा छ । सातदोबाटो १२ खेलमा १८ अङ्क जोडेर पाँचौँ स्थानमा छ । लिगको ११औँ चरणमा मच्छिन्द्र फुटबल क्लबले उपाधि जितिसकेको छ । १३औँ तथा अन्तिम चरणका ७ खेलसँगै लिग सकिनेछ ।

भोलि जावलाखेल युथ क्लब र सङ्कटा क्लब तथा ‘ए’ डिभिजनबाट घटुवा भइसकेको ब्रिगेड ब्वाइज क्लब र थ्री स्टार खेल्नेछन् । लिगको अन्तिम दिन पर्सि तीन वटा खेल हुनेछन् ।