दैलेख । गुराँस गाउँपालिका दैलेखले आयोजना गरेको प्रथम अन्तरपालिका समन्वय बैठकबाट १२ बुँदे रानीमत्ता घोषणा पत्र २०८१ जारी गरिएको छ । आज एक कार्यक्रमकाबिच उक्त घोषणापत्र जारी गरिएकोे हो ।
गाउँपालिकाका अध्यक्ष टोप बहादुर वि.सीको अध्यक्षता तथा कर्णाली प्रदेश सरकारका सामाजिक विकास मन्त्री घनश्याम भण्डारीको प्रमुख आथित्यताा आयोजित बैठकबाट साझा सरोकारका विषय तथा समस्या उपर छलफल गर्न गुराँस गाउँपालिकाले आयोजना गरेको समन्वय बैठक प्रति सम्पुर्ण सहभागी पालिकाको तर्फबाट हार्दिक धन्यवाद दिने र यसलाई निरन्तरता दिँदै आगामी बैठक नियमित रुपमा हरेक पालिकाले आलोपालो आयोजना गर्ने घोषणा, अन्तर पालिका सिमा तथा साँध व्यवस्थापन र समस्या समाधान गर्ने तथा नयाँ समस्यासिर्जना हुन नदिनका लागि सिमा क्षेत्र पहिचान, रेखांकन, सिमा गेट निर्माण तथा नक्सांकनका लागि साझेदारी र समझदारी कायम गर्ने घोषणा गरिएको सुचना अधिकारी दिनेश दाहालले जानकारी दिए ।
यस्तै पर्यटकीय संभावनाहरुको अध्ययन तथा विकास मार्फत साझा पर्यटकीय गन्तब्यको विकासका लागि बजेटगत तथा नीतिगत पहल गर्दै रोजगारी सृजनामा विषेश ध्यान दिने र गुराँसेबजार, रानीमत्तालाई केन्द्रविन्दु मानि पर्यटकीय सर्किट विकास गर्ने घोषणा, सडक पुर्वाधार अन्तर्गत साझा क्षेत्रमा पर्ने सडक तथा पुलहरुको निर्माणमा स्थानीय सरकार, प्रदेश सरकार तथा संघीय सरकार बिच लागत साझेदारीका मार्फत कार्यान्वयनको लागिसंयुक्त पहल गर्ने र सम्बन्धित निकायहरुमा साझा ज्ञापनपत्रदिने घोषणा गरिएको हो ।
दाहालका अनुसार पालिका स्तरिय यातायात सञ्जालको विकास मार्फत स्थानीयहरुलाई सहज आवतजावतको व्यवस्था गर्ने र साझा नगरवस तथा यातायात सेवाका लागि आवश्यक समन्वय, साझेदारी तथा पहल गर्ने, सहकारी, संघ, संस्था,विकास साझेदारहरुको नियमन, व्यवस्थापन तथा विकासका लागि साझा प्रयत्न तथा संवाद थालनी गर्ने, गुणस्तरिय शिक्षाको सुनिश्चितताका लागि साझा पाठ्यक्रम विकास लगाएतका नीतिगत व्यवस्था गर्दै विधालय मर्जर प्रोत्साहन, पढ्दै पढाउँदै कार्यक्रममा साझेदारी तथा एक पालिका एक प्राविधिक शिक्षाकोअवधारणालाई अनुसरण गर्नुका साथै उच्च शिक्षैक संस्थाको संचालनका लागि आवश्यक समन्वय गर्ने, श्रोत साधनको अभावलाई मध्यनजर गर्दे सबै पालिकाले एकै प्रकृतिका यान्त्रिक उपकरणमा लगानी गर्नुको सट्टा साझा उपयोग हुने गरि यान्त्रिक उपकरण, कृषि बजार र अन्य मेला, जात्रा, हाटबजार, चौपाया बजार व्यवस्थापन गर्ने घोषणा गरिएको हो ।
यस्तै अन्तर पालिका स्तरमा रहेका राजश्वका श्रोतहरुको पहिचान तथा उपयोग मार्फत आन्तरिक आयवृद्धि गर्न एकिकृत साझेदारी कायम गर्ने, अन्तर पालिका विपद् व्यवस्थापनका लागि अन्तरपालिका विपद वस्थाव्यपन संयन्त्रको विकास गर्ने, हरेक पालिकाले आफ्ना पालिकामा भएका असल अभ्यास र सिकाई एवमं निर्मित ऐन कानूनको आदान प्रदान गर्ने र आगामी दिनहरुमा यस प्रकारका बैठकहरु कम्तिमा पनि वर्षको १ पटक आयोजना गर्ने गरि घोषणा जारी गरिएको हो ।
गुराँस गाउँपालिकासँग सिमाना जोडिएका सुर्खेतका विरेन्द्रनगर नगरपालिका , बराहताल गाउँपालिका र चिङगाड गाउँपालिका, दैलेखका दुल्लु नगरपालिका , डुङ्गेश्वर गाउँपालीका र भगवतीमाई गाउँपालिका, अछामको तुर्माखाद गाउँपालिका, जाजरकोटको शिवालय गाउँपालिकासंग बैठक बस्ने तयारी गरिएको थियो ।
यद्यपी कार्यक्रममा गुराँस गाउँपालिकासँग सिमा जोडिएका दैलेख जिल्लाका डुङ्गेश्वर गाउँपालिका, चिङ्गाड गाउँपालिका र सुर्खेत जिल्लाका बराहताल गाउँपालिकाका अध्यक्ष तथा उपाध्यक्ष तथा वडाअध्यक्ष्हरुको सहसभागीता रहेको थियो ।
बैठकमा आफ्नो धारणा राख्दै कर्णाली प्रदेश सरकारका सामाजिक विकास मन्त्री घनश्याम भण्डारीले अन्तरपालिका समन्वयात्मक बैठक विपद् व्यवस्थापनको तयारीका लागि मात्रै नभई विकास निर्माण र आर्थिक सम्बृद्धिका लागि पनि बस्नुपर्ने बताए । उनले गुराँस गाउँपालिकाले अन्तरपालिका समन्वयात्मक बैठकको आयोजना गरेर राम्रो सुरुवात गरेको बताए ।
गाउँपालिकाको तर्फबाट कार्यपत्र प्रस्तुत गर्दै अध्यक्ष टोपबहादुर बि.सीले स्थानीय सरकार सञ्चालन ऐन २०७४ को दफा २६ मा भएका व्यवस्थाहरु कार्यान्वयन गर्न र नागरिहरुको उच्चतम् हितका लागि अन्तरपालिका समन्वय बैठक महत्वपुर्ण भएकोले आँफुहरुले यसको सुरुवात गरेको बताए । उनले यसैगरी अन्य स्थानीय तहहरुले समेत बैठकको थालनी गर्नुपर्ने सुझाव समेत दिए ।
बैठकमा बराहताल गाउँपालिकाका अध्यक्ष भिमबहादुर भण्डारी, डुङ्गेश्वर गाउँपालिकाका अध्यक्ष सुन्दर बहादुर केसी तथा चिङगाड गाउँपालिकाका अध्यक्ष बोधबिक्रस जि.सी लगायतले धारणा राखेका थिए
फरकबाटो २१ आश्विन २०८१, मंगलवार २०:१४