सुर्खेत । गण्डकी प्रदेशका नवनियुक्त मुख्यमन्त्री सुरेन्द्रराज पाण्डेले पर्सि बिहीवार विश्वासको मत लिने तयारी भएको छ । वैशाख १४ गते पाण्डे गण्डकी प्रदेशको मुख्यमन्त्रीमा नियुक्त भएका थिए । नियुक्त भएको दोस्रो दिन मुख्यमन्त्री पाण्डेले विनाविभागीय दुई मन्त्रीसहित शपथ लिएका थिए ।
मुख्यमन्त्री पाण्डेले तीन सदस्यीय मन्त्रीमण्डल यसअघि गठन गरिसके पनि मन्त्रालय बाँडफाँट र सरकारले पूर्णता पाउन भने सकेको छैन । सरकारले विश्वासको मत प्राप्त गरेपछि मात्र सरकारलाई पूर्णता दिने गठबन्धन दलबीच सहमति भएको छ ।
आइतवार बसेको मन्त्रिपरिषद् बैठकले प्रदेश सभा अधिवेशन बोलाउन प्रदेशप्रमुख पृथ्वीमान गुरुङसमक्ष सिफारिस गरेअनुसार प्रदेशप्रमुख गुरुङले पर्सि २१ गते दिउँसो २ बजे प्रदेश सभाको अधिवेशन आह्वान गरेका छन् ।
गण्डकी प्रदेश सभामा गठबन्धन दल कांग्रेसबाट २७, माओवादीका सात र एकीकृत समाजवादी (स्वतन्त्रबाट प्रवेश) एक सांसद छन् । सत्ता गठबन्धनमा सामेल सांसदको सङ्ख्या ३५ छ । एमालेका २२ र राष्ट्रिय प्रजातन्त्र पार्टीका दुई सांसद रहेका छन् ।
फरकबाटो १९ बैशाख २०८०, मंगलवार ०९:१३