सुर्खेत । बिहिबार नेपाली काँग्रेसको प्रदेश महाधिवेशन उद्घाटन समारोहमा नेपाली काँग्रेसका महामन्त्री पुर्णबहादुर खड्का सहित नेपाली काँग्रेसका केन्द्रिय सदस्य तथा कर्णाली प्रदेशका मुख्यमन्त्री जीवनबहादुर शाहीको उपस्थिती थियो ।
सोही कार्यक्रममा नेपाली काँग्रेसकै केन्द्रिय सदस्य हृदयराम थानी भने अनुपस्थित थिए । थानी मात्रै होइन उनी निकट नेता समेत वीरेन्द्रनगर बजारक्षेत्रका चियापसलहरुमा गफिएका देखिन्थे । तर कार्यक्रममा भने सहभागी थिएनन् ।
महाधिवेशन उद्घाटन समारोहमा संस्थापन पक्ष (देउवा) पक्ष नेतामात्रै उपस्थीत भएको देखिन्थ्यो । तर पौडेलपक्षका नेता भने उद्घाटन कार्यक्रममा सहभागी थिएनन् । कर्णालीमा काँग्रेसको त्यो दृश्यले उनीहरु दुईखेमामा मात्रै छैनन् दुई छुट्टाछुट्टै पार्टीका नेता हुन् भन्ने झल्को दिएको थियो ।
पौडेलपक्ष कार्यक्रममा सहभागी नभएपछि विभिन्न संचारमाध्यमहरुमा पौडेलपक्षको असन्तुष्टिका समाचारहरु समेत आए । पौडेलपक्षले प्रदेश महाधिवेशन बहिष्कार ग¥र्यो लगाएतका समाचार आउन थालेपछि पौडेलपक्षधर युवानेताहरुले पत्रकार सम्मेलनको आयोजना नै गरे ।
प्रदेश महाधिवेशनमा सभापतीको उम्मेद्धवारी दिने तयारी गरेका कालिकोटका युवा नेता भुपेन्द्रजंग शाहीले आँफुहरुले महाधिवेशन बहिष्कार नगरेको भन्दै समन्वय नभएको कारण महाधिवेशन उद्घाटन समारोहमा उपस्थित नभएको जानकारी दिए ।
पत्रकार सम्मेलनमा बोल्दै उनले आँफु आगामी शनिबार हुने प्रदेश महाधिवेशनमा प्रदेश सभापतीको उम्मेदवार भएको र कर्णालीमा काँग्रेसलाई बलियो बनाउनका लागि आँफुले जित्नु आवश्यक भएको बताए ।
‘पार्टीको नेतृत्व नै भोली सरकारको नेतृत्व हो ’ उनले भने “कर्णालीको सम्बृद्धिको लागि आज पार्टीले असल नेता चुन्नुपर्छ ।” उनले पार्टीभित्र गुट–उपगुट मौलाउनु भन्दा पनि एजेण्डा र कमजोरीको समिक्षा हुनुपर्ने धारणा राखे ।
प्रदेश महाधिवेशन उद्घाटन समारोहको विषयमा बोल्दै शाहीले कार्यक्रम कहाँ हुँदैछ भन्ने सम्मको जानकारी नभएपछि पौडेल पक्षधर नेता हृदयराम थानी, दिनबन्धु श्रेष्ठ लगाएतका नेतासहित प्रदेश तथा जिल्ला स्तरका नेताहरुको उपस्थित नभएको सुनाए ।
राप्रपा, माओबादी लगाएतका पार्टीको बलमा भन्दा पनि एकल सरकार बनाउनेगरि काँग्रेसको नेतृत्व सुधारगर्नुपर्ने समय आएको शाहीले बताए । पार्टीमा कसले कती दुख गरेको छ भन्ने कुराको समेत हेक्का राखी नेतृत्व चयन गर्नुपर्ने उनले तर्क गरे ।
पार्टीको भातृसंगठन तरुण दलका केन्द्रीय महामन्त्री समेत भइसकेका शाही १४ औं महाधिवेशनमा प्रदेश सभापतिका उम्मेदवार बन्ने तयारीमा रहेका हुन् । शाहीले काँग्रेस रुपान्तरणका लागि ३० बुँदे प्रस्तावसमेत पेस गरिसकेका छन् । अधिवेशनमा शुक्रबार मनोनयन र शनिबार मतदानको कार्यतालिका तय भएको छ ।
देउवा समूहबाट कर्णाली प्रदेश सभापतिमा तीनजना आकांक्षी रहेकोमा जुम्लाबाट ललितजंग शाही, जाजरकोटबाट राजीवविक्रम शाह र कालिकोटबाट कालीबहादुर सहकारीको नाम चर्चामा थियो । तर जुम्लाका ललितजंग शाहीनै संस्थापन पक्षबाट सभापतीको मैदानमा भिड्ने भएका हुन् ।
फरकबाटो १६ मंसिर २०७८, बिहीबार २१:१९