सुर्खेत । नेपाल पत्रकार महासङ्घका केन्द्रीय सदस्य त्रिभुवन पौडेलको पोखरामा आइतवार भएको विमान दुर्घटनामा परि निधन भएको छ । ६८ जना यात्रु लिएर काठमाण्डौबाट पोखरा आएको यति एअरलाइन्सको जहाज अवतरण हुन लाग्दा सेती खोँचमा दुर्घटनामा परेको थियो ।
पत्रकार पौडेल २०७७ फागुन ५ गते भएको नेपाल पत्रकार महासङ्घको २६ औँ महाधिवेशनबाट निर्वाचित भइ केन्द्रीय सदस्यमा विजयी भएको थिए ।
पौडेलले पत्रकार महासङ्घ गण्डकी प्रदेश समितिको संस्थापक अध्यक्ष, कास्की शाखामा उपाध्यक्ष र सचिवका रूपमा काम गरेका थिए । पोखरा हटलाइन दैनिकबाट पत्रकारिता सुरु गरेका अन्नपूर्ण एफएम र नेपाल टेलिभिजनमा समेत काम गरेका हुन् ।
उनी पोखरा हटलाइन दैनिक पत्रिकाको प्रकाशक र सम्पादक रहेका थिए । पौडेल प्रेस सेन्टर नेपालका उपाध्यक्षसमेत थिए । उनका श्रीमती र एक छोरा छन् ।
फरकबाटो १ माघ २०७९, आईतवार २१:४४