सुर्खेत । राष्ट्रिय जनगणना २०७८ आजदेखि सुरु भएको छ । ‘मेरो गणना, मेरो सहभागिता’ भन्ने नारासहित आजदेखि जनगणना सुरु भएको हो ।
जनगणनाका लागि देशैभर गरी करिब ४० हजार गणक र आठ हजार पाँच सय जना सुपरीवेक्षक कार्यक्षेत्रमा खटिएका छन् ।
जनगणनाका लागि ८० वटा प्रश्नावली बनाइएको छ । एक जना गणकलाई एउटा परिवारको जनगणना गर्न करिब २० मिनेट समय लाग्ने अनुमान गरिएको छ ।
एक जना गणकले औसत एक दिनमा बाह्रवटा घर परिवारको गणना गर्नुपर्ने केन्द्रीय तथ्याङ्क विभागका महानिर्देशक नेविनलाल श्रेष्ठले जानकारी दिए ।
मङ्सिर ९ गतेसम्म १५ दिन हुने जनगणनाको नतिजा आउन करिब तीन महिना लाग्ने अनुमान गरिएको छ ।
आज संघमा राष्ट्रपति, उपराष्ट्रपति र प्रधानमन्त्रीको जनगणना गरेर जनगणना सुरु गरिने छ । प्रदेशमा मुख्यमन्त्री, स्थानीय तहमा नगर तथा गाउँ प्रमुख र वडामा वडाध्यक्षको गणना गरी जनगणनाको प्रारम्भ गरिने विभागले जनाएको छ ।
उनका अनुसार सातवटै प्रदेश कार्यालय, ८७ वटा जिल्ला जनगणना कार्यालय र तीन सय ५० वटा स्थानीय जनगणना कार्यालय सञ्चालनमा ल्याइएको छ । बिहीबार बिहानैदेखि सबै गणकले घरघरमा पुगेर जनगणना गर्ने विभागले जनाइएको छ ।
फरकबाटो २५ कार्तिक २०७८, बिहीबार ०७:१७