सुर्खेत । दैलेखमा ५५ लाख बराबरको चाँदीजस्तो देखिने गहनासहित दुईजनालाई प्रहरीले पक्राउ गरेको छ । सोमबार दिउसो करिब साढे दुईबजेतिर सुर्खेतबाट दैलेखतर्फ जाँदै गरेको भे १ च ३२१३ नम्बरको डबल क्याप बोलेरो गाडीबाट उक्त सामान बरामद गरिएको हो ।
साबिकको कैलाली जिल्ला नारायणपुर गा।बि।स वडा नं ९ घर भई हाल तुल्सीपुर उपमहानगरपालिका वडा नं १७ बस्ने डम्बर प्रसाद ढुंगाना र चालक टिकापुर नगरपालिका वडा नं ९ घर भई हाल वीरेन्द्रनगर ४ ऐरिचोक बस्ने २६ वर्षीय दिपक पाण्डेलाई प्रहरीले पक्राउ गरेको हो ।
जिल्ला प्रहरी कार्यालय दैलेखका अनुसार ५५ लाख ४० हजार १ सय ३९ रुपैयाँ बराबरको चाँदीजस्तो देखिने गरगहना लगाएत विभिन्न सामानहरु बरामद गरिएको हो ।
चाँदी जस्तो देखिने बस्तुबाट बनेको विभिन्न गहनाहरु २१ हजार ७ सय २५ किलोग्राम र अन्दाजी २४ लाख ७६ हजार ६ सय ५० मुल्य बराबरको र १ लाख ६३ हजार ४ सय ८९ रुपैयाँ बराबरको पोते, पत्थर र गहना राख्न प्रयोग हुने डिक्बाहरु लगाएतका सामानहरु बरामद गरिएको जिल्ला प्रहरी कार्यालय दैलेखका प्रमुख भुवनेश्वर शाहले जानकारी दिए ।
उनले करिब २९ लाख बराबरको बोलेरो गाडी सहित दुईजनालाई नियन्त्रणमा लिई राजश्व अनुसन्धान कार्यालय कोहलपुरमा पठाईएको बताए । उनले कार्यालयले बुझी थप अनुसन्धान थालेको समेत जानकारी दिए ।
फरकबाटो ३ फाल्गुन २०७८, मंगलवार १६:४६