काठमाडौं । म्यानचेस्टर युनाईटेड एफए कप फुटबलको चौंथो चरणबाट बाहिरिएको छ । शुक्रबार राति भएको खेलमा च्याम्पियनसिप क्लब मिड्ल्सब्रोसँग पेनाल्टी सुटआउटमा ८-७ ले पराजित हुँदै युनाईटेड बाहिरिएको हो । खेलको निर्धारित र अतिरिक्त समय १-१ गोलको बराबरीमा सकिएपछि खेल पेनाल्टीमा गएको थियो ।
पेनाल्टीमा युनाईटेडका एन्थोनी इलंगा गोल गर्न चुके । ब्रुनो फर्नान्डेज, क्रिस्टियानो रोनाल्डो, ह्यारी मग्वाएर, डिएगो डालोट, स्कट म्याकटोमीने, फ्रेड र हुवान माटाले गोल गरे। मिड्ल्सब्रोका मार्टिन पाएरो, प्याडी म्याकनेयर, ली पेल्टाएर, डेल फ्राई, डुनकान वाट्मोर, सोल बाम्बा, मार्कुस र जोनी ह्वाउसनले गोल गरे ।
खेल पेनाल्टीमा जानु अघि युनाईटेडले सुरुआती अग्रता बनाएको थियो। २५ औं मिनेटमा जाडोन सान्चोले गोल गर्दै युनाईटेडलाई अग्रता दिलाएका थिए ।
त्यसअघि २० औं मिनेटमा क्रिस्टियानो रोनाल्डोले पेनाल्टीमा गोल गर्न सकेनन् । उनले बाहिर प्रहार गरे । तर, खेलको ६४ औं मिनेटमा म्याट क्रोक्सले गोल गर्दै मिड्ल्सब्रोलाई १-१ गोलको बराबरीमा ल्याएका थिए ।
फरकबाटो २२ माघ २०७८, शनिबार १२:४५