कास्की । जारी नवौँ राष्ट्रिय खेलकुद प्रतियोगितामा नेपाली सेना पदक तालिकामा शीर्ष स्थानमा रहेको छ। आर्मीले दुई स्वर्ण, चार रजत र छ कास्य गरी १२ पदक प्राप्त गरेको छ।
आर्मीका रमाकुमारी सिंह र इन्द्र पौडेलले फेन्सिङमा स्वर्ण प्राप्त गरेका हुन्। यसैगरी बागमती प्रदेश दुई स्वर्ण र एक कास्यसहित तालिकाको द्वितीय स्थानमा छ। बागमतीका ओमकार सिंह र शिक्षा नापितले फेन्सिङमा स्वर्ण पाएका हुन्।
सशस्त्र प्रहरीको एपिएफ क्लब एक स्वर्ण, दुई रजत र पाँच कास्यसहित तेस्रो स्थानमा छ । एपीएफका राजेन्द्र गजुरेलले फेन्सिङमा स्वर्ण जितेका हुन्।
सुदूरपश्चिम प्रदेशका जलेन्द्रबहादुर शाहीले फेन्सिङमा स्वर्ण जितेका छन्। सुदूरपश्चिमले एक स्वर्ण र एक कास्य जितेको छ। नेपाल प्रहरीको पुलिस क्लबले पुरुष क्रिकेटमा स्वर्ण जितेको छ।
आयोजक गण्डकी प्रदेशले हालसम्म एक कास्य पदक मात्र प्राप्त गरेको छ । कर्णाली, लुम्बिनी, मधेस, प्रदेश १ र एनआरएन हालसम्म पदकविहीन छन् ।
राष्ट्रिय खेलकुदमा ३९२ स्वर्ण, ३९२ रजत र ६०० कास्य गरी एक हजार ३८४ पदकका लागि सात प्रदेश, तीन विभागीय टोली र एनआएरएनको टोलीबीच प्रतिस्पर्धा हुँदैछ।
राष्ट्रिय खेलकुद औपचारिकरूपमा असोज २८ देखि कात्तिक ३ गतेसम्म हुने भए पनि २३ गतेदेखि नै केही खेल भइरहेका छन्। पुरुष क्रिकेट प्रतियोगिता यसअघि नै काठमाडौँमा सम्पन्न भइसकेको छ।
हालसम्म सात स्वर्णसहित २७ पदकको टुंगो लागेकोछ।
फरकबाटो २६ आश्विन २०७९, बुधबार १०:४१