सुर्खेत । धामी–झाँक्रीसँग उपचार गराउने नाममा महिला माथि हिंसा गर्ने धामीहरुलाई प्रहरीले पक्राउ गरेको छ ।
जिल्ला प्रहरी कार्यालय सुर्खेतले धामी–झाँक्रीसँग उपचार गराउने नाममा एक जना महिला माथि हिंसा गर्ने तीन जना धामीहरुलाई पक्राउ गरेको हो ।
केही दिन अघि महिलामाथि अभद्र व्यवहार गरेको भिडियो सामाजिक सञ्जालमा सार्वजनिक भएको थियो । उक्त भिडियो सार्वजनिक भए पछि प्रहरी तथा अधिकारकर्मीहरुले ध्यानाकर्षण जनाएका थिए ।
जिल्ला प्रहरी कार्यालयका प्रहरी निरीक्षक कनक शाहीले प्रहरी प्रतिवेदनको आधारमा उनीहरुलाई पक्राउ गरिएको जानकारी दिए । पक्राउ पर्नेमा वीरेन्द्रनगर नगरपालिका ७ का भक्ति ज्ञवाली, वीरेन्द्रनगर ११ का भूपेन्द्र ज्ञवाली र बराहताल गाउँपालिका–८ का मिलन ज्ञवाली रहेका छन् ।
भिडियोमा देवता चढेको भन्दै धामीहरुले महिलामाथि कुटपिट गर्नुका साथै पैतला चटाएका थिए । यद्यपी महिलाले भने प्रहरीमा जाहेरी दिएकी छैनन् । उनले आफु बिरामी भइरहेकोले धामी बोलाएर उपचार गरेको बताउँदै आएको र जाहेरी दिन नमानेको प्रहरीको भनाई छ ।
फरकबाटो ७ पुष २०७८, बुधबार ०९:२८