सुर्खेत । सप्तरीमा बालुवामा खाल्डो खनेर पुरेको अवस्थामा प्रहरीले ८ क्विन्टलभन्दा धेरै गाँजा बरामद गरेको छ ।
हनुमाननगर कङ्कालिनी नगरपालिका वडा नम्बर–१ कोशी ब्यारेजको गोल घरदेखि झण्डै ५ सय मिटर उत्तर पूर्व कोशी भङ्गालको पूर्वी टापुमा खाल्डो खनेर पुरेको अवस्थामा ८ क्विन्टल १० किलो गाँजा बरामद भएको सप्तरीका प्रहरी प्रमुख प्रहरी उपरीक्षक अविनारायण काफ्लेले जानकारी दिए ।
खाल्डो खनेर ठूलो मात्रामा गाँजा राखेको सूचनाको आधारमा जिल्ला प्रहरी कार्यालयबाट खटिएको प्रहरी टोलीले गाँजा बरामद गरेको हो । बालुवा खनेर एक ठाउँमा १२ बोरा, दोस्रो ठाउँमा ९ बोरा र तेस्रो ठाउँमा ६ बोरा गरी २७ वटा बोरामा गाँजा भेटिएको हो ।
२७ वटा बोरामा भेटिएको गाँजाबारे थप अनुसन्धान भइरहेको सप्तरी प्रहरीले जनाएको छ ।
फरकबाटो १६ पुष २०७९, शनिबार १३:५७